پرسیار و وه‌ڵام سه‌باره‌ت به‌سێکس

ماڵپه‌ڕی ده‌روونناسی وه‌ڵامی پرسیاره‌کان ده‌داته‌وه‌

سه‌ره‌تا داوای لێبوردن له‌هه‌موو ئه‌و به‌ڕێزانه‌ ده‌که‌ین که‌وه‌ڵامه‌کانیان دواکه‌وتووه‌، دڵنیابن له‌زووترین کاتدا وه‌ڵام ده‌درێنه‌وه‌، هه‌روه‌ها داواکارین له‌و به‌ڕێزانه‌ی پرسیاره‌کانیان بۆ ئه‌م گۆشه‌یه‌ ده‌نێرن له‌ڕێی کۆمێنتی گۆشه‌که‌وه‌ یان به‌ئیمه‌یلی ماڵپه‌ڕ، ئه‌وا هه‌وڵ بده‌ن پرسیاره‌کانیان دووباره‌ نه‌بێت، بۆ ئه‌وه‌ی دڵنیابیت که‌ئه‌و هاوشێوه‌ی پرسیاره‌که‌ی به‌ڕێزتان وه‌ڵام دراوه‌ته‌وه‌ ده‌کرێت له‌هه‌ردوو گۆشه‌ی سێکس و پرسیار و وه‌ڵام که‌له‌ئه‌رشیفی ماڵپه‌ڕه‌که‌دا بوونی هه‌یه‌، بگه‌ڕێن به‌دوای زانیاری سێکسیدا.

پرسیار: من كچێكی ده‌ستگیراندارم، ئایا ئه‌و هه‌ڵانه‌ چییه‌ كه‌ ئه‌گه‌ر ژن ئه‌نجامی بدات ده‌بێته‌وه‌ هۆی دووركه‌وتنه‌وه‌ی پیاو له‌په‌یوه‌ندییه‌ سێكسییه‌كانی له‌گه‌ڵ هاوسه‌ره‌كه‌ی؟

وه‌ڵام: دیاره‌ هۆكاره‌كان زۆرن به‌ڵام گرنگترینیان بریتین له‌:

1- گرنگی نه‌دانی ژن به‌پاكوخاوێنی جه‌سته‌ و پۆشاكی.

2- گرنگی نه‌دان به‌خۆڕازاندنه‌وه‌ له‌ژووری نووستندا و فه‌رامۆش كردنی كه‌شێكی له‌بار بۆ ئه‌نجامدانی پرۆسه‌ی سێكسیی.

3- ڕه‌چاونه‌كردنی توانا سێكسییه‌كانی پیاو و جۆری كار و پیشه‌ی پیاو.

4- باسكردنی كێشه‌ و گرفت و گله‌یی و گازنده‌كان له‌ژووری نووستن و پێش ئه‌نجامدانی پرۆسه‌ی سێكسیی.

پرسیار: من ژنێكم چه‌ند ڕۆژێكه‌ بۆ ده‌ركه‌وتووه‌ كه‌ دووگیانم، ئایا ئه‌نجامدانی پرۆسه‌ی سێكسیی له‌گه‌ڵ هاوسه‌ره‌كه‌م له‌ماوه‌ی دووگیانیدا زیانی نابێت بۆ دووگیانییه‌كه‌م؟

وه‌ڵام: له‌ سێ مانگی یه‌كه‌می دووگیانیدا ژنان دووچاری هه‌ندێ نیشانه‌ی وه‌ك ڕشانه‌وه‌ و ماندووبوون و گێژبوون ده‌بنه‌وه‌، هه‌روه‌ها له‌م ماوه‌یه‌دا ئاره‌زووی ژنی دووگیان بۆ خواردن كه‌م ده‌بێته‌وه‌، بۆیه‌ له‌ سێ مانگی یه‌كه‌می دووگیانیدا ئاره‌زووی سێكسیی ژنی دووگیان كه‌م ده‌بێته‌وه‌، ئه‌م ڕاستییه‌ش ده‌بێت له‌لایه‌ن هاوسه‌ره‌ پیاوه‌كانه‌وه‌ ڕه‌چاو بكرێت، به‌ڵام مانگه‌كانی چواره‌م و پێنجه‌م و شه‌شه‌م گونجاوترین سێ مانگن بۆ ئه‌نجامدانی پرۆسه‌ی سێكسیی بۆ ژنی دووگیان، سێ مانگی كۆتاییش هه‌ستیاره‌ و ده‌بێت پیاوان زۆر به‌وریاییه‌وه‌ مامه‌ڵه‌ی سێكسیی بكه‌ن له‌گه‌ڵ هاوسه‌ره‌ دووگیانه‌كانیادا، وه‌ده‌بێت له‌ سێكسی ڕووبه‌ڕوو خۆیان بپارێزن(واته‌ پیاو نابێت خۆی بدات به‌سه‌ر سكی هاوسه‌ره‌كه‌یدا)  بۆ ئه‌وه‌ی زیان هاوسه‌ر و كۆرپه‌له‌كه‌ی نه‌گات،‌ وه‌ده‌بێت له‌هه‌ردوو باری ته‌نیشت یان له‌دواوه‌ بۆ پێشه‌وه‌ پرۆسه‌كه‌ ئه‌نجام بدرێت. باشتریش وایه‌ له‌و ماوه‌یه‌دا ژنی دووگیان نه‌گاته‌ ئۆرگازم له‌به‌ر گرژبوونی ماسولكه‌كانی منداڵدانی.

پرسیار: من دووچاری خه‌مۆكێ بووم به‌ڵام هه‌ست ده‌كه‌م ئاره‌زووی سێكسیم زیادی كردووه‌، له‌كاتێدا بۆچوون وایه‌ ده‌بێت ئاره‌زووی سێكسیی له‌كاتی بوونی ئه‌و نه‌خۆشییه‌دا كه‌م بێته‌وه‌ یان نه‌مێنێت؟

وه‌ڵام: به‌ڕێز نه‌خۆشی خه‌مۆكێ چه‌ند پله‌یه‌ك یان چه‌ند جۆرێكی هه‌یه‌، له‌كاتی بوونی خه‌مۆكێی ساده‌ و خه‌مۆكێی مامناوه‌ند ئه‌وا ئه‌گه‌ری زیادبوونی ئاره‌زووی سێكسیی ده‌كرێت، به‌ڵام له‌كاتی بوونی خه‌مۆكیی تونددا ئه‌وا ئاره‌زووی سێكسیی كه‌م ده‌بێته‌وه‌ یان نامێنێت.

پرسیار و وه‌ڵام ده‌رباره‌ی سێکس

ماڵپه‌ڕی ده‌روونناسی وه‌ڵامی ئه‌داته‌وه‌

پرسیار: ئایا زێ یان قیتكه‌ كامیان هه‌ستیارترن بۆ وروژاندن و چێژ له‌كاتی ئه‌نجامدانی پرۆسه‌ی سێكسیدا لای ڕه‌گه‌زی مێینه‌؟

وه‌ڵام: بێگومان قیتكه‌ هه‌ستیارتره‌ بۆ وروژاندن و چێژ وه‌رگرتن لای ڕه‌گه‌زی مێینه‌، ئه‌و چێژه‌ ده‌مارانه‌ی له‌قیتكه‌دا بوونیان هه‌یه‌ نزیكه‌ی هه‌شت ئه‌وه‌نده‌ی ژماره‌ی ئه‌و چێژه‌ ده‌مارانه‌ن كه‌ له‌خودی زێدا هه‌یه‌، هه‌روه‌ها قیتكه‌ ته‌نها فه‌رمانی وه‌رگرتنی چێژ و وروژاندنه‌، به‌ڵام زێ وێڕای ئه‌ندامێكی سێكسیی مێینه‌ بۆ مه‌به‌ستی میزكردن و خوێن دانان و منداڵ بوونیش به‌كاردێت، بۆیه‌ پێویسته‌ له‌سه‌ر هه‌موو هاوسه‌رێك كه‌ وروژاندنی قیتكه‌ فه‌رامۆش نه‌كات له‌كاتی ئه‌نجامدانی پرۆسه‌ی سێكسییدا، ڕێژه‌یه‌كی زۆر به‌رزی ژنان له‌ڕێی قیتكه‌وه‌ نه‌بێت ناگه‌ن بۆ ئۆرگازم.

پرسیار: پیاو چۆن بتوانێت پارێزگاری له‌هێزی سێكسیی خۆی بكات؟

وه‌ڵام: بۆ پارێزگاری كردن له‌هێزی سێكسیی، پیاوان ده‌بێت ڕه‌چاوی چه‌ند خاڵێك بكه‌ن:

1- ڕێكخستنی كاروباره‌كانی ژیان و دووركه‌وتنه‌وه‌ له‌جه‌نجاڵی، خۆ به‌دوورگرتن له‌شه‌كه‌تی جه‌سته‌یی و ماندوبوونی فیكری.

2- دووركه‌وتنه‌وه‌ له‌جگه‌ره‌ كێشان.

3- زۆر نه‌خواردن، چونكه‌ قه‌ڵه‌وی كارده‌كاته‌ سه‌ر هێزی سێكسیی پیاوان.

4- ئه‌نجامدانی وه‌رزش، لانیكه‌م ڕۆیشتنی چه‌ند كیلۆمه‌ترێك به‌پیاده‌ و له‌هه‌وایه‌كی پاكژدا.

5- گرنگیدان به‌خواردمه‌نیانه‌ی ڤیتامیناتی تێدایه‌.

6- گرنگیدان به‌پاكوخاوێنی و ته‌ندروستی ناوچه‌ و ئه‌ندامی زاووزێ.

پرسیار: من ژنێكی هاوسه‌ردارم دووچاری باری ده‌روونی ئاڵۆز هاتووم، تاقه‌تی ئه‌نجامدانی كاری سێكسیم له‌گه‌ڵ مێرده‌كه‌مدا نه‌ماوه‌، ئایا ئه‌م دوو حاڵه‌ته‌ په‌یوه‌ندییان به‌یه‌كه‌وه‌ هه‌یه‌؟

وه‌ڵام: بێگومان تێكچوون و شڵه‌ژانی باری ده‌روونی كاریگه‌ری زۆر ده‌بێت له‌سه‌ر ئاره‌زوو و هێزی سێكسیی لای هه‌ردوو ڕه‌گه‌ز، باشتر وایه‌ به‌ڕێزتان سه‌ردانی پسۆرێكی ده‌روونی بكه‌ن بۆئه‌وه‌ی ده‌ستنیشانی باره‌ ده‌روونییه‌كه‌ت بكات و چاره‌سه‌ری پێویست وه‌ربگریت (ده‌رمان و ده‌روونی)، دڵنیابه‌ به‌گه‌ڕانه‌وه‌ی باری ده‌روونی بۆ بارێكی جێگیر و ئارام، هێز و ئاره‌زووی سێكسیت بۆ ده‌گه‌ڕێته‌وه‌.

پرسیار و وه‌ڵام ده‌رباره‌ی سێکس

ماڵپه‌ڕی ده‌روونناسی وه‌ڵامی پرسیاره‌کان ده‌داته‌وه‌

پرسیار: من گه‌نجێکی ته‌مه‌ن 32 ساڵم، ئایا چالاکی سێکسیی چ په‌یوه‌ندییه‌ک یان چ کاریگه‌رییه‌کی هه‌یه‌ له‌سه‌ر ته‌ندروستی جه‌سته‌یی؟

وه‌ڵام: هه‌موو توێژینه‌وه‌کان سه‌لماندوویانه‌ که‌ جگه‌ له‌وه‌ی ئه‌نجامدانی چالاکی سێکسیی نادروست ده‌بێته‌ هۆی گواستنه‌وه‌ی هه‌ندێ نه‌خۆشی، یاخود هه‌ندێ جار له‌ژیانی هاوسه‌ریدا ده‌بێته‌ هۆی خوڵقاندنی سکپڕی بێ پلان، به‌ڵام له‌گه‌ڵ ئه‌وه‌دا چالاکی سێکسییه‌کان هیچ زیانێکیان نییه‌ به‌ڵکو سوودی زۆری هه‌یه‌ بۆ مرۆڤ، له‌وانه‌: خاوبوونه‌وه‌ و چوونه‌ ناو خه‌وی قوڵ، ته‌ندروستی کۆئه‌ندامی زاووزێ ده‌پارێزێت، هه‌ستکردن به‌به‌خته‌وه‌ری به‌هێز ده‌کات له‌مرۆڤدا، کۆئه‌ندامی به‌رگری به‌هێز ده‌کات، یارمه‌تی مرۆڤ ده‌دات زیاتر به‌رگه‌ی ئازار بگرێت و زاڵ بێت به‌سه‌ر ئازاردا و…تد. هه‌ندێ توێژینه‌وه‌ش ده‌ریانخستووه‌ چالاکییه‌ سێکسییه‌کان ئه‌گه‌ری تووشبوون به‌نه‌خۆشییه‌کانی دڵ و شێرپه‌نجه‌ که‌مده‌کاته‌وه‌.

پرسیار: من گه‌نجێکم گیرۆده‌ی زۆر ئه‌نجامدانی ده‌ستپه‌ڕکردن هاتووم، چۆن وازی لێبهێنم؟ تکایه‌ ڕێنماییم بکه‌ن.

وه‌ڵام: به‌ڕێز ئه‌گه‌ر حاڵه‌تی گیرۆده‌بوونه‌که‌ زۆر بوو ئه‌وا ده‌توانیت سه‌ردانی پزیشکی ده‌روونی بکه‌یت تاکو چاره‌سه‌ری ده‌رمانت بۆ بنووسێت، له‌گه‌ڵ ئه‌وه‌شدا چه‌ند میکانیزمێک هه‌یه‌ ده‌بێت بیگریته‌ به‌ر، له‌وانه‌: خۆت له‌گه‌رماوی گه‌رمدا مه‌شۆ، خۆت به‌دوور بگره‌ له‌وروژێنه‌ره‌ سێکسییه‌کان، هه‌وڵبده‌ به‌ته‌نها له‌ماڵه‌وه‌ یان له‌شوێنێکی دیاریکراودا مه‌به‌، کاتێک به‌ئاگا دێیته‌وه‌ له‌خه‌و زوو جێگای نووستنه‌که‌ت به‌جێ بهێڵه‌، وه‌رزش بکه‌.

پرسیار: من گه‌نجێکی هاوسه‌ردارم، کاتێک جووت ده‌بم له‌گه‌ڵ هاوسه‌ره‌که‌مدا، پاش دوو چرکه‌ چوکم له‌ناو زێدا خاو ده‌بێته‌وه‌ یه‌ک خوله‌ک له‌چوونه نا‌وه‌وه‌ی چوکم بۆ زێی هاوسه‌ره‌که‌م چوکم خاو ده‌بێته‌وه‌، له‌پاش یه‌ک خوله‌کیش ده‌گه‌مه‌ ئۆرگازم، ئه‌م حاڵه‌ته‌ش هاوسه‌ره‌که‌می زۆر بێزار کردووه‌؟

وه‌ڵام: سه‌باره‌ت به‌زوو خاوبوونه‌وه‌ی چوک، ئه‌مه‌ حاڵه‌تێکه‌ له‌حاڵه‌ته‌کانی لاوازی سێکسیی لای پیاوان، که‌ 50% پیاوان له‌نێوان ته‌مه‌نی (40 – 70 ) تووشی ده‌بن، ئه‌م حاڵه‌ته‌ له‌لاوازی سێکسیی یه‌کێکه‌ له‌گرفته‌کانی ڕه‌پ بوونی چوک، بۆنموونه‌ گرفت هه‌یه‌ که‌تیایدا ڕه‌پ بوون ڕوونادات، یاخود وه‌ک ئه‌م حاڵه‌ته‌ی به‌ڕێزت که‌ ڕه‌پ بوونه‌که‌ ناتوانێت به‌رده‌وام بێت تاکۆتایی پرۆسه‌که‌. هۆکاره‌کانی ئه‌م ناته‌واویانه‌ له‌ڕه‌پ بوونی چوکدا (80%) هۆکاری نه‌خۆشییه‌ جه‌سته‌ییه‌کانه‌ و (20%) فاکته‌ره‌ ده‌روونییه‌کان.

هۆکاره‌ ده‌روونییه‌کان وه‌ک: خه‌مۆکێ، نه‌شاره‌زایی له‌کاروباری سێکسییدا، ترسان له‌سه‌رنه‌که‌وتن، دڵه‌ڕاوکێ و ترس له‌سکپڕبوون، دڵه‌ڕاوکێ و ترس له‌گواستنه‌وه‌ی نه‌خۆشی، هه‌ستکردن به‌گوناه له‌ئه‌نجامی بوونی په‌یوه‌ندی سێکسیی ناشه‌رعی، بوونی گرفتی خێزانی و نه‌گونجاندن له‌گه‌ڵ هاوسه‌ر و …تد.

هۆکاره‌ جه‌سته‌ییه‌کانیش، وه‌ک: ڕه‌قبوونی خوێنه‌به‌ره‌کان، نه‌خۆشییه‌کانی دڵ، به‌رزبوونه‌وه‌ی فشاری خوێن، به‌رزبوونه‌وه‌ی کۆلیسترۆل له‌خوێندا. ئه‌م نه‌خۆشییانه‌ی تایبه‌تن به‌موولووله‌ خوێنینه‌کان کاریگه‌ری گه‌وره‌یان هه‌یه‌ له‌ڕۆیشتنی خوێن بۆ چوک که‌ده‌بێته‌ هۆی ڕه‌پ بوون، بۆیه‌ ئه‌م نه‌خۆشییانه‌ له‌هه‌موو هۆکاره‌ جه‌سته‌ییه‌کانی تر باوترن له‌ڕوودانی گرفته‌کانی ڕه‌پ بووندا. هه‌روه‌ها له‌هۆکاره‌ جه‌سته‌ییه‌کانی تر: که‌می هۆرمۆنی نێرینه‌، نه‌خۆشی شه‌کره‌، قه‌ڵه‌وی، ته‌مه‌ڵی و وه‌رزش نه‌کردن، ئازار گه‌یشتن به‌دڕکه‌په‌تک و ….تد.

به‌ڕێز جاده‌بێت هۆکاری ئه‌و حاڵه‌ته‌ی به‌ڕێزتان له‌لایه‌ن پسپۆری تایبه‌ته‌وه‌ ده‌ستنیسان بکرێت، چونکه‌ چاره‌سه‌ری هه‌یه‌ و ده‌توانیت به‌خته‌وه‌ری بگه‌ڕێنیته‌وه‌ بۆ ژیانی سێکسیی خۆتان.

پرسیار: ئایا ده‌ستپه‌ڕکردن ده‌بێته‌ هۆی نه‌زۆکی؟ ئایا کاریگه‌ری بۆ سه‌ر پرۆسه‌ی سێکسیی ده‌بێت له‌گه‌ڵ ئه‌و که‌سه‌ی له‌ئایینده‌دا ده‌بێته‌ هاوسه‌رم؟

وه‌ڵام نه‌خێر هیچ په‌یوه‌ندییه‌کیان له‌نێوانیاندا نیه‌. سه‌باره‌ت به‌کاریگه‌ری بۆسه‌ر په‌یوه‌ندییه‌ سێکسییه‌کانت له‌ئایینده‌دا، به‌ڵێ ئه‌وانه‌ی که‌تووشی گیرۆده‌بوون بوون له‌سه‌ر ئه‌م کاره‌ ئه‌وا له‌ئایینده‌دا دووچاری زووئاوهاتنه‌وه‌ ده‌بن.

پرسیار و وه‌ڵام ده‌رباره‌ی سێکس

ماڵپه‌ڕی ده‌روونناسی وه‌ڵامی پرسیاره‌کان ئه‌داته‌وه‌

پرسیار: من کچێکم نه‌خۆشی شه‌کره‌م هه‌یه‌، ماوه‌ی دوو ساڵه‌ تووشم بووه‌، پێم ده‌ڵێن شه‌کره‌ سێکس لاواز ده‌کات، ئایا ئه‌مه‌ ڕاسته‌؟ ئایا ده‌ستپه‌ڕکردن بۆ من خراپه‌؟

وه‌ڵام: به‌ڕێز شه‌کره‌ به‌زۆری کاریگه‌ری بۆ سه‌ر سێکس لای ڕه‌گه‌زی نێر ده‌بێت تاکو ڕه‌گه‌زی مێ، وه‌ به‌ڕێزتان هێشتا له‌سه‌ره‌تای قۆناغه‌کانی ئه‌م نه‌خۆشییه‌دان، بۆیه‌ هیچ کاریگه‌ری نابێت بۆ سه‌ر ئاره‌زوو و توانای سێکسیتان، به‌ڵام ئه‌گه‌ر ده‌رمانی چاره‌سه‌ر به‌شێوه‌یه‌کی ڕێک و پێک به‌کار نه‌هێنیت و نه‌خۆشییه‌که‌ کۆنترۆڵ نه‌که‌یت ئه‌وا له‌ئایینده‌دا کاریگه‌ری ده‌بێت بۆ سه‌ر لایه‌نی سێکسی به‌ڕێزتان. نه‌خێر ده‌ستپه‌ڕکردن هیچ کاریگه‌رییه‌کی بۆ سه‌ر نه‌خۆشی شه‌کره‌ نابێت.

پرسیار: من کوڕێکم، ئایا ده‌رمانی نه‌خۆشییه‌ ده‌روونییه‌کان کاریگه‌ری هه‌یه‌ له‌سه‌ر گۆڕینی شێوه‌ی سپێرم؟ من ماوه‌ی پێنج ساڵه‌ ده‌رمانی نه‌خۆشییه‌ ده‌روونییه‌کان به‌کارده‌هێنم و هه‌ست ده‌که‌م شێوه‌ی سپێرمه‌کانم گۆڕاوه‌.

وه‌ڵام: به‌ڵێ به‌ڕێز به‌کارهێنانی ده‌رمانی نه‌خۆشییه‌ ده‌روونییه‌کان به‌بڕی زۆر و بۆماوه‌ی درێژ کاریگه‌ری ده‌کاته‌ سه‌ر پێکهاته‌ی سپێرم و شێوه‌یان ده‌گۆڕێت به‌ڵام هیچ کاریگه‌ری نابێت بۆ سه‌ر توانای منداڵبوون.

پرسیار: من کوڕێکم، ئایا خواری ئه‌ندامی زاووزێی نێر کاریگه‌ری هه‌یه‌ له‌سه‌ر جووتبوون؟

وه‌ڵام: به‌ڕێز ئه‌گه‌ر خواری چووک وه‌ک چه‌مانه‌وه‌ یان شێوه‌ی مۆز له‌سنورێکی ئاساییدا بێت ئه‌وا هیچ کاریگه‌ری نابێت بۆ سه‌ر جووتبوون، به‌ڵام ئه‌گه‌ر خوارییه‌که‌ زۆر و نائاسایی بوو ئه‌وا ده‌کرێت له‌ڕێی نه‌شته‌رگه‌ری جوانکارییه‌وه‌ گرفته‌که‌ چاره‌سه‌ر بکرێت.

پرسیار: من ژنێکم تووشی ساردی سێکسی هاتووم، هۆکاره‌که‌ی ئه‌وه‌یه‌ که‌که‌سی دووه‌م له‌ژیانمدا هه‌یه‌، باوه‌ڕ بکه‌ن نازانم چی بکه‌م زۆر بێزاربووم له‌ژیانی خۆم، تکایه‌ ڕێنماییم بکه‌ن؟

وه‌ڵام: به‌ڕێز خۆت ده‌ستنیشانی هۆکاره‌که‌ت کردووه‌، له‌به‌ر ڕۆشنایی ئه‌و هۆکاره‌ش چاره‌سه‌ره‌که‌ ڕوونه‌، که‌خۆی له‌دوو ڕێگادا ده‌بینێته‌وه‌: یان ئه‌وه‌تا هاوسه‌ری ئێستات په‌سه‌ند بکه‌ و وه‌ک ئه‌مری واقع مامه‌ڵه‌ی له‌گه‌ڵ بکه‌ و هه‌وڵبده‌ ورده‌ ورده‌ خۆت له‌ڕابردوو دوور بخه‌ره‌وه‌، به‌تایبه‌تی ئه‌گه‌ر منداڵیشتان له‌نێواندا بێت ئه‌م ڕێگه‌یه‌یان په‌سه‌ندتر و ژیرانه‌تره‌. یاخود ئه‌وه‌یه‌ که‌تۆ له‌م هاوسه‌ره‌ت جیابیته‌وه‌ و خۆت بکه‌یته‌ قوربانی نادیار، ئایا که‌سی دووه‌م که‌له‌ژیانتدا هه‌یه‌، نه‌چۆته‌ ژیانی هاوسه‌ریی؟ ئایا ئه‌و ئاماده‌یه‌ واقعی تۆ له‌پاش جیابوونه‌وه‌ په‌سه‌ند بکات؟ ئایا ئه‌گه‌ر منداڵت هه‌بێت چاره‌نووسی منداڵه‌که‌ت چی لێدێت؟…تد. له‌به‌رئه‌مه‌ ئه‌م ڕێگه‌ چاره‌یه‌ په‌سه‌ند نییه‌. ئه‌گه‌ر به‌ڕێزتان دانیشتووی کوردستانن ده‌توانن سه‌ردانی سه‌نته‌ری ڕاوێژکاریی خێزان بکه‌ن له‌سلێمانی تاله‌نزیکه‌وه‌ ڕێنمایی زیاتر بکرێیت.

پرسیار و وه‌ڵام ده‌رباره‌ی سێکس

ماڵپه‌ڕی ده‌روونناسی وه‌ڵامی پرسیاره‌کان ئه‌داته‌وه‌

پرسیار: مێرده‌که‌م نه‌خۆشی پشت ئێشه‌ی له‌گه‌ڵدایه‌ زۆر باری جووتبوون هه‌یه‌ ئه‌و ئازار ئه‌دات یان بۆی ته‌واو ناکرێت، تکایه‌ چ بارێک بۆ جووتبوونی نێوانمان گونجاوه‌ له‌م حاڵه‌ته‌ی مێرده‌که‌مدا؟

وه‌ڵام: ئه‌و پیاوانه‌ی نه‌خۆشی پشت یان کێشه‌یان له‌بڕبڕه‌کانی پشتیان هه‌یه‌، باشترین بار بۆ جووتبوونی سێکسی ئه‌وان ئه‌و باره‌یه‌ که‌پیاوه‌که‌ له‌سه‌ر پشت ڕابکشێت و هاوسه‌ره‌که‌ی له‌سه‌ره‌وه‌ بێت، له‌م حاڵه‌ته‌دا تۆی ژن ڕۆڵی چالاک له‌پرۆسه‌که‌دا ده‌بینی و چێژ بۆ هه‌ردوولا مسۆگه‌ر ده‌بێت چونکه‌ له‌م باره‌دا ده‌کرێت هه‌موو چوکی پیاو بچێته‌ ناوه‌وه‌، هه‌روه‌ها پیاوه‌که‌ت ئاسانتر ده‌توانێت ده‌سته‌کانی به‌کاربهێنێت بۆ وروژاندنی ئه‌ندامه‌ هه‌ستیاره‌کانی تۆ وه‌ک (قیتکه‌ و مه‌مک)، ئه‌م باره‌ له‌سێکس کردن بۆ ئه‌وانه‌ش گونجاوه‌ که‌نه‌خۆشی دڵیان هه‌یه‌، هه‌روه‌ها بۆ ئه‌و پیاوانه‌ی که‌ چووکیان بچوکه‌.

پرسیار: من ژنێکی ته‌مه‌ن 26 ساڵم پیاوه‌که‌م له‌گه‌ڵ ته‌واوبوونی خۆیدا ده‌ستبه‌جێ ده‌کشێته‌وه‌ دواوه‌ له‌کاتێکدا من ئه‌گه‌رچی ته‌واویش بووم به‌ڵام هێشتا پێویستم به‌و ماوه‌، چی بکه‌م باشه‌؟

وه‌ڵام: یه‌کێک له‌گرفته‌ باوه‌کانی سێکسی نێوان هاوسه‌ران له‌کۆمه‌ڵگه‌ی ئێمه‌دا ئه‌مه‌یه‌، پیاوان له‌گه‌ڵ ته‌واوبوونی خۆیاندا ده‌کشێنه‌ دواوه‌، له‌ڕاستیدا ده‌بێت پیاوان ڕه‌چاوی ئه‌وه‌ بکه‌ن که‌ هاوسه‌ره‌کانیان پاش گه‌یشتنیشیان به‌ئۆرگازم پێویستیان وته‌ی شیرین و ماچ و ئامێزی هاوسه‌ره‌کانیان ده‌بێت هه‌تا چه‌ند خوله‌کێک، ڕه‌چاونه‌کردن و پیاده‌نه‌کردنی ئه‌م ئه‌رکه‌ی پیاو به‌رامبه‌ر هاوسه‌ره‌که‌ی ده‌بێته‌ هۆی که‌مبوونه‌وه‌ی چێژ یان به‌تاڵکردنه‌وه‌ی چێژه‌که‌ و وه‌ک ئه‌وه‌ی ژنه‌که‌ هه‌ر سێکسیشی نه‌کردبێت.

پرسیار: من پیاوێکی هاوسه‌ردارم، هه‌شت ساڵه‌ له‌ژیانی هاوسه‌رییدام، ته‌مه‌نم 41 ساڵه‌، من له‌پاش ئه‌نجامدانی پرۆسه‌ی سێکسی له‌گه‌ڵ هاوسه‌ره‌که‌م یه‌کسه‌ر خه‌وم لیده‌که‌وێت، ئایا هۆکاری ئه‌مه‌ بۆچی ده‌گه‌ڕێته‌وه‌ و زیانی نییه‌؟

وه‌ڵام: به‌گشتی پیاوان له‌زۆربه‌ی باردا له‌پاش ته‌واوبوونی پرۆسه‌ی سێکسیی حه‌ز به‌ڕاکشان و خه‌و ده‌که‌ن، هۆکاری ئه‌مه‌ش ده‌گه‌ڕێته‌وه‌ بۆ ‌ئه‌و هۆرمۆنانه‌ی که‌له‌کاتی گه‌یشتنی پیاو به‌ئۆرگازم ده‌رژێت، ئه‌مه‌ش هۆکارێکی سه‌ره‌کییه‌ له‌خاوبوونه‌وه‌دا، هه‌روه‌ها هه‌ستکردن به‌حه‌وانه‌وه‌ و ئارامی له‌پاش ئه‌نجامدانی پرۆسه‌ی سێکسیی وا له‌پیاو ده‌کات ئاره‌زوویه‌کی به‌تینی هه‌بێت بۆ خه‌و. ده‌کرێت بڵێین ئه‌و هۆکارانه‌ی وا له‌پیاو ده‌کات هه‌ست به‌ئاره‌زوویه‌کی به‌تین بۆ خه‌و بکات له‌پاش ئه‌نجامدانی پرۆسه‌ی سێکسیی، ئه‌مانه‌ن:

1- ئه‌و ماندووبوونه‌ی به‌هۆی ئه‌نجامدانی سێکسه‌وه‌ تووشی ده‌بێت و ئه‌و خاوبوونه‌وه‌یه‌ی له‌ئه‌نجامی گه‌یشتن به‌ئۆرگازم پێیده‌گات.

2- پرۆسه‌ی ئاوهاتنه‌وه‌ خۆی له‌خۆیدا هۆکارێکی ماندووبوونی پیاوه‌.

3- زۆربه‌ی پیاوان له‌کاتی ئه‌نجامدانی پرۆسه‌ی سێکسیدا گوێ به‌لایه‌نی هه‌ناسه‌دان ناده‌ن، هه‌ناسه‌ی قوڵ هه‌ڵنامژن، هه‌ربۆیه‌ له‌م کاتانه‌دا هه‌ناسه‌دانی پیاو ناڕێک ده‌بێت، به‌مه‌ش جه‌سته‌ بێبه‌ش ده‌بێت له‌ئۆکسجین، ئه‌مه‌ش ده‌بێت هۆی خه‌واڵووبوونی پیاو.

پزیشکه‌کان ڕێنمایی ده‌ده‌ن به‌وه‌ی که‌مێک قاوه‌ بخورێته‌وه‌ پێش ئه‌نجامدانی سێکس، چونکه‌ ماده‌ی کافیین جه‌سته‌ به‌ئاگا و چالاک ده‌هێڵێته‌وه‌.

پرسیار: من گه‌نجێکی ته‌مه‌ن 31 ساڵم، خێزاندارم، له‌ئاوهاتنه‌وه‌دا کێشه‌م هه‌یه‌، تکایه‌ ڕێنمایی؟

وه‌ڵام: به‌ڕێز گرفته‌کانی ئاو هاتنه‌وه‌ جۆری زۆره‌ و هۆکاریشی زۆره‌‌، ئێمه‌ نازانین به‌ڕێزتان کام گرفته‌تان هه‌یه‌ به‌ڕێکی، بۆنموونه‌ له‌گرفته‌کانی ئاو هاتنه‌وه‌ وه‌ک: ئاو هاتنه‌وه‌ به‌بێ ڕه‌پ بوونی چووک، ئاو هاتنه‌وه‌ به‌بێ ڕه‌پ بوونی ته‌واو، ئاوهاتنه‌وه‌ی پێشوه‌خت ( پێش ئه‌وه‌ی‌ چووک بچێته‌ ناو زێ، یان چه‌ند ساتێک دوای چوونه‌ ناو زێ)، ئاونه‌هاتنه‌وه‌، ئاوهاتنه‌وه‌ بێ هه‌ستکردن به‌چێژ و خۆشی..تد. ئه‌مانه‌ هه‌موو گرفتی جۆراوجۆرن له‌ئاوهاتنه‌وه‌دا، بۆیه‌ باشتره‌ خۆت پیشانی پسپۆری تایبه‌ت بده‌یت تاکو جۆر و هۆکاره‌که‌ی دیاری بکات و چاره‌سه‌ری پێویست وه‌ربگریت.