به‌بۆنه‌ی هاتنی جه‌ژنی ڕه‌مه‌زانی پیرۆزه‌وه‌ جوانترین پیرۆزبایی ئاڕاسته‌ی سه‌رجه‌م نووسه‌ران و خوێنه‌رانی ماڵپه‌ڕه‌که‌مان ده‌که‌ین، هه‌روه‌ها پیرۆزبایی له‌سه‌رجه‌م کوردستانیانی ئازیز ده‌که‌ین له‌ هه‌ر کوێیه‌کی ئه‌م گه‌ردوونه‌دا بن، هیوای ده‌رووندروستی و ئارامی بۆ گشت لایه‌ک ده‌خوازین و بۆ گه‌له‌که‌شمان سه‌رفرازی و ڕزگاری یه‌کجاری که‌ خۆی له‌دروستبوونی ده‌وڵه‌تی کوردیدا ده‌بینێته‌وه‌.
هه‌موو ڕۆژێکتان هه‌ر جه‌ژن و شادی و خۆشی بێت.

ماڵپه‌ڕی ده‌روونناسی

به‌بۆنه‌ی کوژاندنه‌وه‌ی سێیه‌مین مۆمی ته‌مه‌نی ماڵپه‌ڕی ده‌روونناسییه‌وه‌ جوانترین پیرۆزبایی ئاڕاسته‌ی سه‌رجه‌م نووسه‌ران و خوێنه‌رانی به‌ڕێز ده‌که‌ین، ماڵپه‌ڕی ده‌روونناسی له‌ سێ ساڵی ڕابردوودا توانیویه‌تی خزمه‌تێکی بچووک به‌خوێنه‌رانی خۆی بکات، به‌ئومێدی ئه‌وه‌ی بتوانین درێژه‌پێده‌ری کاروانی ساڵانی ڕابردوومان بین. جارێکی تر ده‌ستی گشت نووسه‌ره‌ به‌ڕێزه‌کان ده‌گووشین که‌ به‌ خامه‌ به‌بڕشته‌کانیان فێنکایی ده‌گه‌یه‌ننه‌ ده‌روونی خوێنه‌رانی ماڵپه‌ڕی ده‌روونناسی و له‌م ڕۆژگاره‌ پڕ جه‌نجاڵی و فشاری ده‌روونییه‌دا ڕێنمایی دروست و زانستی له‌بواری ده‌روونی و کۆمه‌ڵایه‌تیدا ده‌گه‌یه‌ننه‌ خوێنه‌ران.

ماڵپه‌ڕی ده‌روونناسی
31/7/2010
سلێمانی

سه‌نته‌ری ڕاوێژکاریی خێزان بۆ گرفته‌ ده‌روونی و کۆمه‌ڵایه‌تی و په‌روه‌رده‌ییه‌کان له‌شاری سلێمانی له‌ (1/8/2008) دامه‌زرا و وه‌ک ڕێکخراوێکی ناحکومی بۆ ماوه‌ی دوو ساڵه‌ به‌رده‌وام له‌بواری کێشه‌ و نه‌خۆشییه‌ ده‌روونی و کۆمه‌ڵایه‌تی و په‌روه‌رده‌ییه‌کاندا ئه‌سپی خۆی تاوداوه‌ و له‌و ماوه‌یه‌دا خزمه‌تێکی به‌رچاوی پێشکه‌ش به‌هاوڵاتیانی کوردستان به‌گشتی و پارێزگای سلێمانی به‌تایبه‌تی کردووه‌.
ئه‌م سه‌نته‌ره‌ له‌ماوه‌ی دوو ساڵی ته‌مه‌نیدا (773) حاڵه‌ت و نه‌خۆشی ده‌روونی و (58) کێشه‌ی کۆمه‌ڵایه‌تی ڕووی تێکردووه‌، که‌ کۆی دانیشتنه‌ ده‌روونی و چاره‌سازییه‌کان نزیکه‌ی (9000) دانیشتن بووه‌، حاڵه‌ته‌کان منداڵان، هه‌رزه‌کاران، گه‌نجان، به‌ساڵاچووان، له‌هه‌ردوو ڕه‌گه‌ز بوون. هه‌روه‌ها سه‌نته‌ری ڕاوێژکاریی خێزان له‌ماوه‌ی دوو ساڵی ڕابردوودا (127) سیمینار و وۆرک شۆپی بۆ چین و توێژه‌ جیاجیاکانی کۆمه‌ڵگه‌ ئه‌نجامداوه‌ (ئافره‌تان، قوتابیان و خوێندکاران، مامۆستایان، گه‌نجان، فه‌رمانبه‌رانی داموده‌زگاکانی حکومه‌ت، ڕێکخراوه‌کانی کۆمه‌ڵگه‌ی مه‌ده‌نی)، له‌ناو شاری سلێمانی و ناوچه‌کانی (هه‌ڵه‌بجه‌ی شه‌هید، چه‌مچه‌ماڵ، بازیان، سه‌یدسادق، چوارتا، ماوه‌ت، سه‌نگه‌سه‌ر، قه‌ره‌داغ و چه‌ند ناوچه‌یه‌کی تر. هه‌روه‌ها ئه‌م سه‌نته‌ره‌ له‌بواری ڕاگه‌یاندندا ڕۆڵێکی به‌رچاو ده‌گێڕێت له‌بڵاوکردنه‌وه‌ی هۆشیاری ده‌روونیدا له‌ڕێگه‌ی به‌شداری کردنی ئه‌ندامه‌کانی له‌پرۆگرامه‌کانی که‌ناڵه‌ ته‌له‌فزیۆنی و ڕادیۆییه‌کاندا، هه‌روه‌ها له‌ڕێگه‌ی نووسینی وتار له‌ڕۆژنامه‌ و گۆڤاره‌کاندا. هه‌روه‌ها سه‌نته‌ری ڕاوێژکاریی خێزان (CD)ییه‌کی بڵاوکردۆته‌وه‌ که‌ پێنج ڕاهێنانی ده‌روونی له‌خۆده‌گرێت و له‌لایه‌ن پسپۆری ڕاهێنانه‌ ده‌روونییه‌کان به‌ڕێز (عبدالله‌ تۆفیق)ه‌وه‌ ئاماده‌کرابوو. جگه‌ له‌م خزمه‌تگوزاریانه‌ سه‌نته‌ره‌که‌مان له‌ڕێی ئینتێرنێته‌وه‌ دانیشتنی ئه‌له‌کترۆنی بۆ چه‌ندین هاوڵاتی کوردستانی ئه‌نجامداوه‌ که‌ له‌ده‌ره‌وه‌ی وڵات ده‌ژین.
له‌کاتێکدا یادی دوو ساڵه‌ی ته‌مه‌نی سه‌نته‌ری ڕاوێژکاریی خێزان ده‌که‌ینه‌وه‌، به‌شانازییه‌وه‌ ده‌ڵێین: سه‌ربڵند و به‌خته‌وه‌رین به‌و خزمه‌تگوزاریانه‌ی پێشکه‌شی هاوڵاتیانمان کردووه‌ له‌هه‌ر کوێیه‌ک بووبن، ئێمه‌ به‌پشوویه‌کی درێژ و خۆنه‌ویستانه‌ و دوور له‌هه‌موو به‌رژه‌وه‌ندییه‌کی مادی و که‌سیی ئه‌و خه‌رواره‌ زۆر و زه‌وه‌نده‌مان له‌چالاکیی ئه‌نجامداوه‌، له‌به‌رامبه‌ریشدا به‌داخه‌وه‌ هه‌تاکو ئێستا حکومه‌تی هه‌رێمی کوردستان و ده‌زگا په‌یوه‌ندداره‌کان وه‌ک پێویست ئاوڕیان له‌و سه‌نته‌ره‌ و ستافه‌ ماندوو نه‌ناسه‌که‌ی نه‌داوه‌ته‌وه‌.
ئه‌وه‌ی مایه‌ی خۆشحاڵی ئێمه‌یه‌ ئه‌م سه‌نته‌ره‌ بۆته‌ مایه‌ی دڵنیایی و متمانه‌ بۆ ئه‌و هاوڵاتیانه‌ی ڕووی تێده‌که‌ن، به‌جۆرێک له‌به‌ر ڕه‌چاوکردنی ئه‌خلاقی پیشه‌یی پزیشک و توێژه‌رانی ده‌روونی سه‌نته‌ره‌که‌ و پیاده‌کردنی نهێنی پارێزی بۆ کێشه‌ جۆراوجۆره‌کانی هاوڵاتیان، هاوڵاتیان به‌وپه‌ڕی متمانه‌ و بڕواپێبوونه‌وه‌ کێشه‌ ده‌روونی و کۆمه‌ڵایه‌تییه‌کانیان ده‌هێننه‌ سه‌نته‌ر.
له‌م یاده‌دا جوانترین پیرۆزبایی ئاڕاسته‌ی سه‌رجه‌م پزیشک و توێژه‌ره‌ ده‌روونییه‌کان و کارمه‌ندانی کارگێڕی سه‌نته‌ری ڕاوێژکاریی خێزان ده‌که‌م، ده‌ستی ماندوونه‌بوونیان ده‌گوشم، دڵنیابن ئێوه‌ ڕه‌زامه‌ندی و متمانه‌ی هاوڵاتیانی کوردستانتان به‌ده‌ستهێناوه‌ ئه‌ویش به‌هۆی به‌رزی ڕه‌وشتی پیشه‌یی خۆتانه‌وه‌ بۆیه‌ له‌پارێزگای هه‌ولێر و گشت قه‌زا و ناحیه‌کانی پارێزگای سلێمانی و شاری که‌رکوکی خۆشه‌ویست و خانه‌قینه‌وه‌ هاوڵاتیان ڕوومان تێده‌که‌ن. هه‌ر له‌م بۆنه‌یه‌دا به‌ڵێن به‌هاوڵاتیانی به‌ڕێز ده‌ده‌ین که‌ له‌کاروانی خزمه‌ت کردنماندا به‌رده‌وام ده‌بین هه‌رچه‌نده‌ ڕێگاشمان سه‌خته‌ له‌م ڕۆژگاره‌دا.
هه‌موو لایه‌کتان به‌خته‌وه‌ر و سه‌ربه‌رز و سه‌رفرازبن

توێژه‌ری ده‌روونی
سامان سیوه‌یلی
سه‌رۆکی سه‌نته‌ری ڕاوێژکاریی خێزان
سلێمانی
31/7/2010

ڕۆژی (1/8) سێ ساڵ تێده‌په‌ڕێت به‌سه‌ر ته‌مه‌نی ماڵپه‌ڕی ده‌روونناسیدا،‌ له‌م ڕۆژه‌دا ماڵپه‌ڕی ده‌روونناسی وه‌ک ڕۆژنامه‌یه‌کی ئه‌له‌کترۆنی زانستیی تایبه‌ت به‌ ده‌روونناسی هاته‌ بواری ڕۆژنامه‌نووسیی کوردیی ئه‌له‌کترۆنییه‌وه‌، هه‌تا ئه‌مڕۆش وه‌ک پێشه‌نگی ماڵپه‌ڕ و گۆڤار و ڕۆژنامه‌کانی کوردستان له‌بواری ده‌روونناسیدا ماوه‌ته‌وه‌، له‌م یاده‌دا داوا له‌نووسه‌ر و خوێنه‌ره‌ به‌ڕێزه‌کانی ماڵپه‌ڕه‌که‌مان ده‌که‌ین، هه‌ر سه‌رنج و تێبینییه‌کیان هه‌یه‌ به‌مه‌به‌ستی زیاتر گه‌شه‌کردنی ئه‌م ماڵپه‌ڕه‌ و پڕکردنه‌وه‌ی هه‌ر که‌لێنێک که‌ بوونی هه‌بێت، بۆمان ڕه‌وانه‌ بکه‌ن له‌ڕێگه‌ی پۆستی ئه‌له‌کترۆنی به‌ڕێوه‌به‌ری ماڵپه‌ڕه‌وه‌.
له‌گه‌ڵ ڕێز و خۆشه‌ویستیمان
s.siwaily@gmail.com

ئەم دوو خوشكە میهرەبانە ناویان ئەژین و ئامینەیە لە خێزانێكی هەژارو كەمدەرامەت دا لە شارەدێی كانی قرژاڵە ی سەر بە شاری هەولێر ژیان دەگوزەرێنن ، باری تەندروستیان لەو پەڕی خراپیە .
هەر لەگەڵ لە دایك بوونیان تووشی نەخۆشی پولەكەی ماسی هاتوون لە هەمان كات دووچاری تەنگە نەفەسی و بوارانەوەش دێن .
(موحسین مەعروف) باوكی ئەژین و ئامینە كە كاری دارتاشی دەكات ووتی لە نێوان مناڵەكانی تری تەنیا ئەو دوو كچەی ئەو نەخۆشیەیان تووش بووە ، ووتیشی سەردانی چەند پزیشكێكی تایبەتی پێستمان كردووە نەگەیشتوینەتە چارەسەری كۆتایی،بەڵام ئاماژە بەوە دەكەن كە لە دەرەوەی ووڵات لە 80% ڕەنگە چارەسەری نەخۆشیەكەیان هەبێت و بكرێت ، كاك موحسین ئاماژەی بەوەش دا كە دوای ئەوەی كە لە هەردوو كەناڵی ئاسمانی گەلی كوردستان و كوردستان تیڤی ماوەیەك لەمەوبەر هەواڵی كچەكانی بڵاو كرایەوە دوای بڵاو بوونەوەی ڕاپۆرتەكەیان تا ئێستا هیچ لایەنێك لە دەرگای ئەوانی نەداوە بەمەبەستی هاوكاری كردنیان
فاتیمە سەعید ) ی دایكیان بە گریانەوە ووتی ئەمە حاڵی كچەكانمە و لە ژیانێكی زۆر نائاسایی ژیان دەگوزەرێنن ، بەردەوام بە دیاریانەوە هەناسەی سارد هەڵدەكێشم و لە یەزدان دەپاڕێمەوە .
دووا ووتەی باوكیشان ئەوە بوو لە چاوەڕوانی هیمەتی خێر خوازان دا بێت و ئاوڕێك لەو دوو خوشكە میهرەبانە بدەنەوە .
ئێمەش داواكارین كە پسپۆڕانی پێست ئەو بابەتە بخوێننەوە و بە دواداچونێك بۆ ئەو نەخۆشیەی ئەو دوو خوشكە بكەن و لەو مەینەتیە رزگاریان بكەن
لە ڕێگای ژمارە مۆبایلی 07504832096

ماڵپه‌ڕی ده‌روونناسی